მელოდრამა -- დრამატული ჟანრის შინაარსის პიესა, რომელშიც ასახულია ბოროტისა და კეთილის შეჯახება, შეიცავს სატირულ ეპიზოდებსაც; ძველად მუსიკალურ-დრამატული სასცენო ნაწარმოები, რომელშიც მოქმედ პირთა დიალოგებსა და მონოლოგებს ახლდა მუსიკა, თვითონ მსახიობები კი არ მღეროდნენ.
მეჯლისი -- დიდი წვეულება, ნადიმი. ძველად ზოგი მონაწილე იკეთებდა ნიღაბს და იმოსებოდა ფანტასტიკურ-ეთნოგრაფიული ტანსაცმლით.
მთიულური -- ქართული ცეკვის სახეობა.
მიზანსცენა -- სპექტაკლის ამა თუ იმ მონაკვეთში მსახიობების განლაგება დეკორაციის წინასწარ დათქმული რიგით.
მიმიკა -- სახის კუნთების მოძრაობით შინაგანი განცდისა და გრძნობების გამოხატვა.
მინიატურა -- მოკლე მოთხრობა ან მოკლე პიესა-ვოდევილი, ინტერმედია, სკეტჩი, დიალოგური ან მუსიკალური სცენა, საკლოუნო სცენა.
მოდელი -- რაიმე საგნის ნიმუში. თეატრში სპექტაკლის მაკეტი.
მონოდრამა -- ერთმოქმედებიანი დრამა, რომელსაც ასრულებს ერთი მსახიობი; ძველი ბერძნული დრამის სახეობა, რომელშიც მსახიობი ნიღბისა და ტანსაცმლის გამოცვლით ასრულებს სხვადასხვა როლს.
მონოლოგი -- ნაწარმოებებში ან სპექტაკლში თავისთავისადმი ან სხვისადმი (პარტნიორი, მაყურებელი) მიმართვა; ერთი მოქმედი პირის მიერ ჩასატარებელი სცენა.
მოქმედება -- პიესის, სპექტაკლის ერთ-ერთი ძირითადი ნაწილი.
მუზა -- ძველ ბერძნულ მითოლოგიაში ხელოვნებისა და მეცნიერის მფარველი და შთამაგონებელი ერთ-ერთი ცხრა ქალღმერთთაგანი.
მუსიკა -- სინამდვილის ბგერითი მხატვრული სახეებით ამსახველი ხელოვნების დარგი; შესაფერ ნაწარმოებთა ერთობლიობა.
